El branu tien un aquel de paréntesis, de tiempu onde aprovechamos pa facer esas cousas que nun sirven pa nada y al tiempu son imprescindibles: cumo samargullase n’aquel llibru, olvidase del reló xunto a los amigos o nadar a la caída del sol. Inclusive pa facer cursos de branu sobre’l llionés. Esti pasáu xueves terminóu’l cursu que daba la Universidá de Llión sobre esa llengua que pa muchos nun val pa nada, pero que pa outros, ensin embargu, paeznos que tien el valor de las cousas que nos faen realmente humanos. Y sinon ehí están la música o la poesía.
Abría’l cursu’l Conseyeiru d’Educación. Alcordábanos el valor patrimonial del llionés, pero remarcaba que lo verdaderamente importante yera deprender llenguas cumo’l inglés, el francés o’l chinés. A naide que valore por riba de todo’l pragmatismu va extraña-y esti argumentu; las llenguas apaecen eiquí dientro del discursu de la globalización. Cada día llevantámonos con noticias onde nos cuentan lo preocupaos qu’están los políticos pola despobración, pero la lóxica qu’está detrás de las palabras marcha en sentíu contrariu encoyéndose d’hombros mientras ponnos un pasaporte ensin vuelta entre las manos.
Nuna ocasión, un amigu del escritor inglés Gilbert Keith Chesterton llegóu a la súa casa y ancontróulu faciendo las maletas. Cuando-y perguntóu a ónde diba, l’escritor respondíeu-y que marchaba de viaxe pa Chelsea. ¿Pa Chelsea? – respondíeu’l sou amigu – ¡Pero si ya estás en Chelsea! Exacto, – dixo-y Chesterton – voi pa Chelsea pasando por Viena, París y Constantinopla. De la mesma forma, deprender llionés puede ser cumo un viaxe. Nel cursu que rematóu la recién creada Cátedra de Estudios Leoneses pudimos comprobar la experiencia de purfesores de llengua que lu utilizoron nas súas clases. Contóron con emoción cúmo los sous alumnos escomenzoron a mirar con outros güeyos el sou patrimoniu y cúmo muchas familias valororon l’interés de los rapaces pol mundu perdíu de los sous mayores.
El coñocimientu humanu ye enorme y puede llevanos mui llonxe. Puedemos deprender qu’el mundu ye inmensu y que ye posible llegar onde queramos. Nun lo refuguemos. El viaxe ye voluntariu, ye salir al mundu y volver pol caminu conocíu a esi requeixín al que pertenecemos. Nun coñocer el caminu de vuelta llévanos a outra cousa bien diferente: dalgo que nun ye viaxe sinon emigración. Un viaxe ensin retornu.
(Cola corrección y ayuda inestimable de Nicolás Bartolomé)
